Mae'r chwilio'n parhau o amgylch Afon Menai ar ôl i fachgen yn ei arddegau fynd i'r dŵr.
Mae'r gwasanaethau brys wedi bod yn cribo'r ardal drwy gydol y penwythnos ers derbyn adroddiad toc cyn 9.45yb bore Gwener diwethaf.
Ond er gwaethaf nifer asiantaethau'n chwilio'n helaeth, nid ydy'r llanc wedi'i ddarganfod.
Nid yw'r bachgen wedi cael ei enwi'n ffurfiol eto, ond roedd yn gwisgo jîns a hwdi porffor ar y pryd.
Yn ôl Heddlu Gogledd Cymru, bydd dronau arbenigol yn parhau chwilio drwy gydol yr wythnos, hefo help swyddogion chwilio arbenigol ac asiantaethau partner pan fydd amodau'r llanw a'r tywydd yn caniatáu.
Dywedodd y Prif Arolygydd Stephen Pawson o Heddlu Golgedd Cymru: "Mae fy meddyliau hefo teulu'r bachgen yn y cyfnod anodd hwn."
"Mae ein swyddogion yn parhau rhoi help iddyn nhw ac yn eu diweddaru nhw'n rheolaidd ar ein hymchwiliad ni."
"'Da ni'n diolch i'r gymuned am eu help parhaus ac yn parhau annog aelodau'r cyhoedd roi gwybod i ni ar unwaith."
"Dwi'n deall bod aelodau'r gymuned yn awyddus helpu hefo'r chwilio. Buaswn i'n annog gwirfoddolwyr ystyried peryglon yr arfordir yn ofalus a newid mewn amodau'r tywydd yn ystod y chwilio. Mae hyn er mwyn gwneud yn siŵr nad oes unrhyw un yn cael eu niweidio."
Os oes gennych unrhyw wybodaeth am y diflaniad, neu sydd wedi gweld unrhyw beth, cysylltwch gyda Heddlu Gogledd Cymru ar 101, gan ddefnyddio’r rhif cyfeirnod 48138, neu drwy ddefnyddio'r sgwrs byw ar wefan yr heddlu.
Apêl i adrodd am droseddau treftadaeth
Arestio 19 mewn gweithredu cyffuriau yng Ngwynedd
Gaerwen: cyhuddo dyn o stelcian
Carchar i ddyn ar ôl dwyn gwerth dros £50,000 o dlysau
Academi gofal yn lansio yng Ngwynedd
