Mae gwaith wedi dechrau ar ddatblygiad tai fforddiadwy ym Mangor.

Bydd deg eiddo yn cael eu hadeiladu ar hen safle Ysgol Babanod Coed Mawr.

Mae'r prosiect yn rhan o Tŷ Gwynedd - cynllun adeiladu tai gan y cyngor sir Cyngor Gwynedd i fynd i'r afael â phrinder tai yn lleol.

Mae datblygiad tebyg hefyd wedi dechrau yn Llanberis - gyda chynlluniau i greu tua 1,000 o gartrefi fforddiadwy erbyn 2027, fel rhan o gynllun gweithredu tai y cyngor.

Dywedodd y Cynghorydd Craig ab Iago, aelod cabinet dros dai ac eiddo: "Mae'r prosiect yma'n rhan hollbwysig o fy ngweledigaeth...i sicrhau ein bod yn darparu'r hawl dynol sylfaenol o gartrefi fforddiadwy ac addas i drigolion Gwynedd."

"Dw i'n falch iawn o weld y gwaith ar y tai yma'n dechrau er mwyn darparu tai i bobl leol." 

"Mae'r angen am dai fforddiadwy yn tyfu'n gyflym ar draws y wlad, a bydd y galw yma ond yn dwysáu wrth i'r argyfwng costau byw effeithio ar fwy o bobl."

Bydd deg tŷ yn cael eu codi ar y safle hwn, sef chwe thŷ gyda thri llofft a phedwar tŷ gyda dwy lofft.

Bwriad y tai yw diwallu anghenion pobl leol, yn enwedig rheini sy'n ei chael hi'n anodd prynu neu rentu cartref ond sydd efallai ddim yn gymwys am dŷ cymdeithasol.

Disgwylir y bydd y gwaith adeiladu yn cwblhau o gwmpas gwanwyn 2026.

Ychwanegodd y Cynghorydd ab Iago: "Dw i'n annog unrhyw un sydd efo diddordeb yn yr hyn sydd gan y cynllun yma i'w gynnig ymweld â safle we Tai Teg er mwyn gweld a ydynt yn gymwys i gofrestru gyda Tai Teg am dŷ fforddiadwy."